البُلُلُم (عامية)

من طرف ma7moud amer السبت 13 سبتمبر 2008, 10:27 pm

هذه الكلمات إهداء لكل من يرفض أن يركب عليه الحمار

البُلُلُم

قابلت البللم وانا نازل
الصبح بدرى كان ماشى
عزمنى على فول وفلافل
وقال تحيه ع الماشى
شكله بصراحه ماعجبنيش
ووشه كان مليان خرابيش

سألنى سؤالين...
البللم
وزغر لى بالعين...
البللم

أول سؤال كان فى محله
ودُغرى قلت له على حله
كان السؤال ياجماعة الخير
يا كل إنس ووحش وطير
جحا والحمار.. ماشيين ماشيين
على طول سوا همَّا الاتنين

لكن اللى حير...
البللم
وخللى بقى...
يتلجم

مين يا ترى راح يركب مين
الجحش والا البنى ادمين
أنا ردى كان جدا واضح
وقلته بلسانى الفاضح
لازم جحا يركب على طول
وهو ده الرأى المعقول
كلامي يظهر ما عجبهوش
وحط بوزه ف طبق الفول

حصل له إحباط...
البللم
لجِّمته برباط...
البللم

رجع و قال لى كلام تانى
والله كان كله معانى
رأيه الحمار يركب جحا
ومن العشا لحد الضحا
أصل الحمار بيجيب المال
يبقى جحا عنده شغال
لقيت كلامه فعلا مظبوط
وقعدت ازمر توت توت

وشد نفسين...
البللم
وغمز لى بالعين...
البللم

أما بقى سؤاله التانى
زعلنى أوى أوى آه يانى
تصورو كان عاوز ايه
يا كل أخ وأخت وبيه
والله دية حاجه تكسف
والقلب من جوه اتأسف
قال ان هو صاحب المال
من غيره بطنى تلف شمال
وقال كمان م الشعر بيتين
البق أكِّل واخزى العين
عشان عطانى طبق الفول
لازم أنا أخرس على طول
واللى معاه الكاش الكاش
يركب علينا والا بلاش
ورجعت انا لجحا وحماره
وأخينا بانت افكاره
عاوز بجهله وفلوسه
يغمِّى عقلى ويدوسه
ويبقى هو صاحب المال
وانا اللى اكون عنده شغال
ويحق له على طول يركب
والدنيا كلها تتشقلب

غباوته أنهار...
البللم
وجهله قنطار...
البللم

رميت فى وشه طبق الفول
ولطشته بالكفين على طول
وقلت له يا بعيد يا حمار
يابو مخ أتفه م المسمار
دا مهما كان عندك من كاش
وبطنى شبعت والا بلاش
سيدك أنا حافضل جحا
راكبك ف ليل والا ف ضحا
وانت الحمار تستنى حمار
مهما كسبت فلوس أنهار

وسبته ومشيت...
البللم
وهو ح يشيط...
البللم

]

من طرف sandrilla الأحد 14 سبتمبر 2008, 12:17 pm

بصراحه بصراحة انا كننت مستنية تكتب اسم الكاتب تحت الاغنيه دي
بس شكل النتدي فيه شاعر كبير واحنا مش عارفين
اهلا بحضرتك يافاندم

البُلُلُم (عامية)

البُلُلُم (عامية)

رد: البُلُلُم (عامية)